Clean Election dak rangloker tang aruya aliba 13 buba Nagaland Legislative Assembly (NLA) election nung tokteptsü pur Aor candidate-tem den saraademba sentong ka Rogonü (Tue) Impur nungAo Baptist Arog Mungdang (ABAM)-i ayongzüka agi.

Iba sentong nung candidate S. Chuba Lkr (Angetyongpang A/C), Dr. Benjungliba Aier (Alongtagi A/C), Moatoshi (Dimapur 2 A/C), E.T. Sunep (Jangpetkong A/C) aser Dr. Amos (Dimapur 2 A/C) parnok pungu dak alaka tanüngba candidate ajak arua iba sentong nung shilem agia denogo.

Iba sentong nung ABAM Executive secretary, Rev. Dr. Mar Atsongchanger-i okilatsüdang, Clean Election ya shinga anema tenzükba masü saka asen lima mangdang akar aser ochishir lenir adokdaktsütsü aser temelenshi ka bener arutsü nükla yur tenzükba lir, ta metetdaktsü.

Asen lima election merüka agitsü asoshi yaküm 2017 küm uly 27 nungi tenzüka sarasadem inzü ghonda 7000 agia aruba den clean election dak sendakba nung sentong tapu balala ayongzüka aruogo, ta paisa ashi.

Candidate ajaki election mapang merüka shilem agiba den candidate shirnoksa adokdir, ajaki Naga nunger arok ajungtsu atema ochi shia inyaktsü asoshi paisa inyakdaktsünüba olen ka shisem.

Sentong nung tarur candidate-temi mapang tatsütsü agia election nung nokdakba nükjidong aser mangdang balala lemsatepa liasü. ABAM Tir, Dr. Temjen-i candidate-tem atema temoatsü meshia sarasademtsü.

ABAM Clean Election Core-Committee mendenbuba, Mr. Sentisashi aser Aor Pastors’ fellowship Tir, Mr. Lipok Jamir natia asen lima yanglutsü asoshi merükteta iba election agitsü o tatsütsü jembi.

ABAM-I candidate ajak nem Laishiba kaka agi senpettsü. Constituency 11 nung Aor candidate ajak agi parnok 37 lir.