ABAM Church & Mission Ministry ajanga ayonga,"Tanelar Phusemer" angazükshi sentong ka Impur nung Metsüremi 20 & 21,2025, agiogo. 

Tanü arogo nung tanelar wadang nung tongti shilem agiba telok ya "Tanelar Phusemer" telok ya lir. Tsüngremi nisung nem  agütsüba sempet rongnung jangratemtsü sempet ya iba tanela phusemba sempet ya lir. Arogotem nung tanela asüngsashi sentong balala nung shilem tulu agia aika tanela nung aniteta tepela taküm lia otar. Parnok ya lenmang aisü nung tongti shilem agir ta angateta, kati ka nungi angazüka tim yimya nung shilem tuluba agitettsü nükla yur iba sentong ya agiogo.

Sentong nung Shisa Len Sayur, Rev. Dr. S. Wati Aier aser Mrs. Imtijungla Longchar liasü. Agüja aliba onük "Ni Ya Shiba" aser "Pei Tajaba Metetba Taküm" nung ajemdaker pei tajaba angateta kulisüba mapa den taküm libaliro ajanga sayutetba taküm asütsü tesayuba tajung agüja liasü.

Metsüremi 21 anepdang 6:00 Am - 8:00 Am tashi ABAM nung tenzükertemi anir sentong nung adenertem ajak lumia sarasademba mapang tajung agia temoatsü tulu ngugo. 

Maneni Tanelar Phusemertem tanela wadang inyaka aodang Tsüngremer teyari nung inyaktsü sarasademer.