Maneni ABAM Literature & Education Ministry ajanga Lanujen Waden Zone 5 & 6 asoshi Chiteni (July) 26-28, 2024 nung "Kümdangdi" Kolosi 2:8 omen sür Khar Baptist Arogo nung sentong kanga dang junga agiogo. Sentong nung Tsüngi O jembir Dr. Moanungsang, Tzüdir, Secretary, Education & Literature, ABAM ajanga asüng asoshi tanü tanurtemji metsü tajung shiteta ayuba aser tarutsü mangdang tajung ayuba ta angateta Ministry ajanga kanga nendaka sayua arurdar. Anungji iba ministry ya tarutsü mapang asoshi teimla ta angateta bendanga agüja sayutsü ayongzük.

  Sentong nung onük jembirtem Kongro. Moanaro Asso. Pastor, Christian Education, Kümlong BA, Wabong. Imsentiba Jamir, Coodinator, Sunday School Ministry, ABAM, aser Watsü. Abenla Aier, Coordinator, Children Ministry, ABAM, liasü. 

Iba sentong nung Mangkolemba BA Christian Education Ministry ajanga kenten ania liasü aser Kongro. Moamenla APCE, Dibuia BA aser Sangbang. Lumong, ABCE, Changkiyimlang BA kütdangpur liasü. 

Iba sentong nung Arogo 22 nungi delegates 432 arua aden. Khar Baptist Arogo ajanga iba sentong achaayangba dang masü saka chiyunga ajemba ajak agütsüba asoshi pelaba lemsateper aser Tsüngremi arogo maneni moajangma. 

Maneni ABAM Literature & Education Ministry yakbang süa arogotem nung Children Ministry ajanga tanurten ochi lenmang nung ania aodang Tsüngremi ochi meimer lanurtem aika adokdakjang ta sarasademer.