ABAM Zone wise Deacon training Zone 4,5,6 &7 agi

ABAM Zone wise Deacon training Zone 4,5,6 &7 “Tenzüktsü Asoshi” omen nung April 6 & 7, 2019 anogo Impur nung agiogo. Arogo 45 nungi Deacon tem 210 arua iba sentong nung aten. Iba sentong nung Mungdang aser Lim arogo tesendaktep, Baptist Arogo yimten yimsüsüba, Arogo aser Yimten tesendaktep aser tepila, Decaon ka teinyaktsü aser Tenzüktsü ajaba onüktem agia liasü. Item onüktem yamai lemsaer agia liasü.

Rev. Dr. Mar Atsongchanger Executive Secretary, ABAM ajanga “Tanü Mungdang aser Lim arogo
tesendaktep” shilem agia liasü. Pai I Thessalonika 1:5 nung “…Tsüngrem O ya ain nung aru…” ta asüba nung ajemdaker asenok ya alimar lokti ka nung tenzüker masü saka Tsüngremi shimtetba lokti ka nung tenzüker asünung, asenok dak Tsüngrem O koba ain nung aru iba ain ji medenra asen wadang temer aseni bendenba süngjang mangutsü aser aseni iba asoshi sasatsü. Anungji mapang tataktet ka tenzükdang Tsüngrem ain meshia ochishia bendanga agüja mesasatsüsa tenzükti ta ayongzük.

Rev. I. Lima Jamir, Pastor Kumlong B/A ajanga Baptist arogo yimten yimsüsüba , Arogo aser Yimten tesendaktep aser tepila” onüktem nungi jembi; aser iba mapang o jembiri asenoki nübor dang arung ta asüba nungi meyipa Tsüngremer nukjidong tonga inyaktsü asoshi joko asenoki nübor bushia oti ta ayongzük.

Rev. Lanuyanger, Darogapathar ajanga Deacon ka teinyaktsü aser Tenzüktsü ajaba onüktem nungi jembi; aser pai asenoki tenzükba wadang nung ochi aser shitak (Truth & right) benteta tenzüktsü aser ochi
kümzüka yua tasü ita tenzüktsü mapang lir ta ayongzük. Tatembang sentong nung ABAM Executive Secretary-i anir ABAM staff aser Shisa len sayur ajanga Khristai sayuba ama ajemalua tila küma
tenzüktsü temaitsü Deacontem tetsüng shitokja, tang nungi yamai asenoki ajemalua Tsüngrem tenzükti ta ayongzüka iba sentong tembang.