Ao Arogotem nung Choir Mastertem asoshi music training ka Mokokchung Town B/A, Kohima Ao B/A aser Dimapur Ao B/A ajanga Impur nung February 5-7, 2020 tashi aguja liasu. Tanu arogotem asoshi ibaya rongdak nungdak ta angateta rongsen jenti entokaka arogotem nung nubortem ajaki lirumedema ken atenba ajanga Tsungrem sentsuwangshidaktsutsu nukla nung iba training agia liasu.
Rev. Dr. Mar Atsongchanger Executive Secretary, ABAM ajanga tayongzukba agutsuba mapang Mr. Noksenger (Garo) kibongi Yisu dak amangba ajanga par kibong rangben tepsetba mapang Noksengi ashiba O " Ni lemtetogo Yisu den aotsu, ku den shinga maruyonga nibo odang anidaktsu aser kangki ku jakdang aser alima ku sulen liaka nibo odang anidaktsu ni lepa maotsu" koba tasutait o ajanga yimtsung nung tekolakbai anir yimer ajak Yisu sulen anidaktsu lemtet, iba o nungi Indian Missionary Sadhu Sundar Singh aser American hymn editor William Jensen Reynold ajanga ken yanglu aser tanu iba ken ajanga ajak dak kongshir yamaji aseni yangluba aser atenba ajanga nubor mulung nung kongshitsusa sarasadema inyaktsu nungdak ta ayongzuka liasu. Paisa training nung atener ajak dang tia ajak nung kechi sudir suang "Ni lemtetogo Yisu den aotsu" ta asuba tamang nung asenoki lidi ta tayongzukba tulu agutsu.
Mr. Yanglu Pongen MTBA, Mr. Pangerlemba MTBA, Mr. Talimeren DABA, Ms. Amongbi Jamir KABA aser Mr. Moanok Tzudir KABA ajanga basic aser advance telok anaji lemsaer sayua tarurtem tangazukba jenti lia agiogo. Ajak agi arogo 47 nungi Music Director aser Choir Mastertemi anir nisung 96 arua iba training nung aten.
Maneni arogotem ken tenba mapa nung temulung aguja inyakdang Tsungremi pa sentsuwangshi asoshi amangbapur ajak yariangma aser MTBA, DABA aser KABA dang pelaba den maneni Tsungremer wadang asoshi maneni nenok amshiangma ta ABAM sarasadem ayur.
