ABAM Education & Literature Ministry ajanga ayonga tsüklai (Feb) 21, 2024, anogo International Mother Language Day amongba den külemi "Tetsü Oshi Terenlok" sentong ka Impur nung kanga takok ngua agiogo.

Iba sentong nung ABAM staff, Ao Riju, Ao Kaketshir Mungdang (AKM), aser Aor Tsükong trok nungi kaketshir lenirtem ajak agi nisung 60 shi arua iba sentong nung aden. 

Tanü asen oshi samaa yokba ajanga asen ayak samaa aoba tia aikati ajurua odar aser iba ama dang asenoki libalirora, alima otsü nung oshi samaba rongnung asen Ao oshi ya yakta tensemtsü. Anungji, memenudang asenoki asen oshi taküm kümdaktsüra tarutsü putu nung ajaki metsünga reta Ao oshi amshitsü ta nükla nung iba sentong agiogo.

Rev. Dr. Mar. Pangener, Executive Secretary, ABAM ajanga tajungshi O ashiba mapang nung, oshi aika metetbaji kanga senti aser tepelatsü, saka tetsü oshi nung tashi ka lir aser iba tashi ajanga dang asen ayak sayur. Ayak samara taküm nung shilem tuluba ka mali akümer. Anungji, nisung ka ayak pentet penteta ayutsü asoshi tetsü oshi meima benshitsü akang akanga ajungshia liasü.

"Tetsü Oshi Jenjang Nung Lenir ka Shilem" aser " Tetsü Oshi Zülumen Lirumedem" onüktem Dr. Lanurenla, Principal, Sao Chang College, Tuensang aser Mr. I. Temjen Tzüdir, Coordinator, Ao Riju ajanga jembia liasü. 

Tsüngremi asen Aor nem asen Tetsü Oshi meima benshitsü tangatetba agüja asen ayak jangja jangja sayuteta alima nung yimjung yanglur kin ka südakjang ta sarasademer.