ABAM Social Concern Ministry ajanga ayonga ABAM Zone 8 & 9 asoshi Alcoholic Anonymous (AA)  ajungshitep sentong March 11, 2024, anogo Ao Baptist Arogo Diphupar nung kanga takok ngua agiogo.

Tanü asen arogotemi temesepba chiyungtsü achi ajemertem asoshi sentong balala agia taküm nung tazüokba tulu ngua kija, kibong, aser lokti nung tepela aser tesünep bener aruba jenti lir. Yamaji jentipur asoshi parnok ya kuli tajung kaka asütsü tongtipang ta angateta iba sentong ya agiogo. Iba sentong nung tongti O jembir Rev. C.Teyong Kichu, Missionary liasü. Pa ajanga, Tsüngremi pa taochi ajanga asenok kümzüka lir, aser iba tekümzükba kuli bener jentipur tangi aotsü asen mapa asütsüla. Anungji nisung shiai iba tangatetba nung osang tajung abener südi ta tayongzükba tulu agütsü.

Iba den külemi arogotem nung AA telok anebalurtem ya kanga tongtipang alinung parnok asoshia shisa tokden sentong ka Mr. Imosanen, KAKA ajanga Shisalen sayur süa kanga temoatsü nung tabensaba nung agiogo.

Ajak agi Arogo 11 nungi Sannükertem, AA anebalurtem, AA zungsem aser Silas Care Women Rehabilitation Center nungi nisung 111 arua iba sentong nung aten.

Iba sentong ajak Ao Baptist Arogo Diphupar ajanga achaayangba asoshi ABAM ajanga kanga pelaba lemsatepa  Tsüngremer temoatsü meshitsür.

Arogotemi maneni iba Ministry inyaka aodang, jentipur taküm nung temelenshi bener arutsü tamang ayur.

Sd/- 

Rev. Dr. Mar Pongener 

Executive Secretary, ABAM