ABAM-i  ayongba nung ABAM Church & Mission Ministry ajanga acha-ayanga  ABAM Lim arogotem Sannüker tanela nung Kümkümshiba sentong February 17 & 18, 2022 Impur nung kanga takok ngua agiogo. Iba sentong nung arogo 112 nungi Sannükertem 135 shi arua aden.

Pela agizükba mapang nung Rev. L. Yapang Mollier Secretary, Church & Mission, ABAM ajanga ashiba agi iba sentong ya ABAM Sesquicentennial nükla yur Arogo nung toklang tenzükertem ajak Khristar wadang asoshi tanela nung kümkümshia alitsü asoshi agiba sentong mezüngbuba lir. ABAM otsü nunga toklang tenzükertem ajak asoshi pei pei telok saseb tanela nung kümkümshiba sentong agibaya mezüngbuba lir. Anungji, ajaki iba maongka yabo amajok mesüdaktsütsü ta tangatetba nung dendi ta ayongzük.

Iba sentong nung O jembirtem aser onük telemsa yamai liasü.

Rev. Dr. Mar Pongener, Executive Secretary, ABAM ajanga “Na Kong Lir” Lipok 3:9 nungi ajemdaker jembiba mapang, sannükertem dang Tsüngremer wadang nung na kong nokdaka lir? Santem len jemia aodang mesüra samaba mapang na sannüker ka kong lir? Ta pei sasa asüngdanga tenzüktsüla ta ashi. Maneni paisa joko asenok santem asen dangi aruba kisüng asoshi matai asenoki parnok bushia aotsü mapang ali nung, Tsüngremi na kong lir ta ashidang ni santem den lir ta shitettsüsa nüktzü ayim mesasai bendanga agüja santem den mapang peria intoka tenzüktsüla ta ayongzük.

Rev. Lanuyanger Nükmen ajanga “ Tajaba Shitak Metettsü Jangrang” 2 Peter 1:10 nungi asenok ya tangar dang nungi alaka shimtetba telok asünung, nai na ajaba züzüa mebilemi, ni inyaktsü jatetba mapaya tangar shilem masü saka kü shilem ta angatetang ta ashi. Aser yamaji ni iba mapa asoshi jatet asünung santem den mapang intoktsü ji kü tatah shilem ta angateta bendanga agüja tenzükang ta ayongzük.

Rev. Sentisashi, Senior Pastor, KABA ajanga “Tarok Leni Yiang” Luk 5:4 nungi samaba santem jenti lenti nung masü saka kinük nung tarokdak lir. Item bushitsü asoshi asenoki asen sadoksadoka aliba tia yutsür timtem akaba lenmang jagi yia mebushira asen sannükba mapa amajok lir ta ashi. Paisa, tarokdak aliba santem anir arutsü asoshi Yisuji mezüng mesüdaktsüra lenmang tesadang ka nung asenok dena samatsü ana nung lir. Anungji Yisu tama südaktsür pei tenzükba menden nungi ali alua tenzükdi ta ayongzük.

Maneni toklanga tenzükertem lokti balala iba sentong agia aodang Tsüngremi tenzükertem taküm moajang ta sarasadem ayur.

Sd/-

Rev. Dr. Mar Pongener

 Executive Secretary, ABAM