ABAM WM ajanga ayonga Asso. Pastor Women aser Dorka Cell / Kiyim Lanutsür sentong kanga takok nung March 15-17, 2024, Impur nung agiogo. 

Dorka Cell / Kiyim Lanutsür ya Arogo nung kanga tongtipang telok ka lir. Kibong tim anebalu asüba nung yimjung, tesünep aser temoatsü lir. Yamaji tanü  Dorka Cell / Kiyim Lanutsür ya kibong anebaluba telok lir. Kibong jungra lokti ajak junga alitsü alinung ABAM WM ajanga parnok dak temelenshi bener arutsü tashi lir ta amanga iba sentong ya "Temaleni" omen nung agi. 

Tongti O jembirtem; Rev. Tiatoshi Longkümer Pastor, KABA, Dr. Samuel Longkümer, Administrator, SCM, Dimapur, Mrs. Imtilemla Longkümer, Principal, Impur Bible Seminary, Mrs. Alemla Mozür, Secretary, ABAM WM, aser Mrs. T. Arenla Longkümer, Coordinator, ABAM WM liasü. Parnok ajanga tanü alima nung rangben terenlok aliba ajanga kija, kibong aser lokti temaleni atuba aisü nung angur. Yamaji tekübok tiai aiba lir. Anungji koba, kodang aser koba inyaka libalirotsü meteta libaliroba nung dang kija, kibong aser lokti temaleni atutsü. Anungji, alima terenlok nung alitsü tim, saka shisa kaa asen tim shilem inyaka shi aser tanela nung lirumedema lia alima nung tesünep aser yimjung bener arua temaleni anir südi ta jembia tayongzükba tulu agüja liasü.

Ajak agi arogo 117 nungi Asso. Pastor Womeni anir Dorka Cell/Kiyim Lanutsür 908 arua iba sentong nung aden.

Arogotem nung iba telok ajanga kulisüba mapa tulu inyakdang Tsüngrem lenisüba nung kija aser lokti ajak nung temelenshi bener arutsü sarasaem ayur.

Sd/-

Rev. Dr. Mar Pongener

Executive Secretary, ABAM