ABAM Literature & Education Ministry ajanga Khristar wadang nütsüngsüba nung kanga temulung agüja tanurtem asoshi sentong akaba rongnung Lanujen Waden ya ka lir. 2023 nungi zone lemsaer agia arudar aser Zone 4 asoshi Rongchii 26-28, 2024 nung "Kümdangdi" Kolosi 2:8 omen sür Tuli Lenten Baptist Arogo nung sentong kanga dang junga agiogo. Sentong nung tayongzükba O jembir Dr. Moanungsang, Tzüdir, Secretary, Education & Literature, ABAM ajanga tanü tanurtemji asüng asoshi metsü tajung shiteta ayuba aser nükla tajung ayuba ta angateta Ministry ajanga kanga nendaka sayua arur aser aika temoatsü agia arudar, anungji iba ministry ya tarutsü putu asoshi teimla ta angateta bendanga agüja sayutsü ayongzük.
Sentong nung onük jembirtem Mrs. Temsüla Along, Derector & Founder of Children Counseling Ministry, Dimapur, Mr. Imsentiba Jamir, Coodinator, Sunday School Ministry, ABAM, aser Mrs. Abenla Aier, Coordinator, Children Ministry, ABAM, liasü.
Extravagenza Event ka liasü aser iba sentong nung Special appearance Mr.Temsümongba Jamir, Alempang liasü. Tesayurtem asoshi Tsüngrem den jurila sensaksem mapang agiba mapang ka agi aser iba mapang Mrs. Abenla APCE, Kangtsüng BA ajanga lenia temoatsü mapang tajung ka agi.
Iba sentong nung Arogo 15 nungi delegates 627 aria aden. Tuli Lenten Baptist Arogo ajanga iba sentong achaayangba asoshi pelaba lemsateper.
Iba sentong nung tongtipang mapang ka agiabaji "Omni Sophia, Children Bible App" asen Ao oshi nung adokba Dr. Moanungsang Tzüdir, Secretary, Education and Literature, ABAM ajanga sayaa liasü. Iba App ajanga tanur kati Tsüngrem O angaba dang masü saka azüngtsü asoshi Laishiba nungi otsü kar agiteta inyaka aruogo. Takaraba nung App ji Playstore subscription angutsü imla atar. Mapang apir App ajanga otsütemji update asütsü. Iba App nung otsü renema azünger aser teyariteper Associate Pastor Christian Education tem nungi 12, Arogo & Mungdang lenla balala nung inyaker 14, App developer 1 ajak agi nisung 27 tashi agi yaritepa adoker. Iba app ya mapang tatsüka tsüngda nung ajaki download süa amshitettsü sarasadema atar.
